أنا أبو العربي

/uploads/70/13/701388cefb8ee6935157ffc2e0cf405d/abo_el3araby.jpg

أبو العربي يعني الرجولة، يعني المجدعة، يعني الشهامة، يعني المخ النضيف
أبو العربي وبس يا جدع.. لا بريد الجمعه ولا الخميس ولا حتى الأتنين
أبو العربي يعني نأتيكم بالحلول أينما كنتم وحللتم وذهبتم

أبوالعربي يعني.. ولا أقولكم
كفاية كده ميشكرش فى نفسه الا الشيطان

ابو العربي

الثقه
انا خايفه يكون كداب مش قادره اصدقه ولا اكدبه من كتر اللى حصلى قبل كده بقيت بشك فنفسى ... المزيد

الثقه

5/16/2010 8:50 am  

بص يا ابو العربى
انا بعتلك كتييييييييييييير اوى وانت مطنشنى وحكيت مشكلتى بالتفصيل اكتر من مره

انا دلوقتى خلاص تعبت ومش قادره حتى اكتب

مش عايزه منك غير انك تقولى ازاى اعرف ان الحد اللى قدمى اهل للثقه ولا لأ ومتقليش تصرفاته بتبين لأنى ياما اتخدعت من ناس كتير قبل كده وعشان كده بقيت بخاف من خيالى

انا دلوقتى معايا انسان لو بجد صادق ومش بيخدعنى يبقى بجد هديه من ربنا ليا

بس انا خايفه يكون كداب مش قادره اصدقه ولا اكدبه
من كتر اللى حصلى قبل كده بقيت بشك فنفسى

حاسه انى هتجنن وخايفه اضيعه من ايدى وفنفس الوقت خايفه احافظ عليه ويطلع ميستاهلش زى ناس كتير قبله

ابوس ايدك رد عليه

لوكا
أنثى 17 سنة

لو مكنتيش تحلفي بس

بصي يا لوكا، قبل كل شيء أنا مش الجني بتاع مصباح علاء الدين، عشان أعرفلك الشخص اللي تقصديه ينفع تديله حياتك ولا لاء.

أنا بس بنصح.. والتصرف في البداية والنهاية لكي أنتِ

ببساطة..
عشان نعرف الأنسان ده أهل للثقة ولا لاء، مش مطلوب مننا غير أننا نراقب تصرفاته لفترة معينة، وخصوصا التصرفات اللي بتبقى بشكل طبيعي وعفوي، من غير أستعداد ولا تكلف. لأن الحاجات دي محدش بيعرف يتصنع فيها ولو حاول بيتكشف بسهولة.

ذي إيه؟
صفة ذي أحترام الغير والتعامل بذوق مع الآخرين
لو كان الشخص بيتصنع الصفة دي، فسهل جدا تاخدي بالك من تصرفاته العادية مع الناس ومع اللي حواليه في الشارع مثلا.. لأن المحترم بيبقى محترم مع الجميع وف كل الأوقات، مفيش زلات ولاهفوات.

قيسي بقى على كل تصرفاته.. لو هو فعلا هدية ذي ما بتقولي، هتلاقيه مثالي في كل حاجة، لكن لو كان بيتصنع هتلاقيه بيقع وبيغلط.. لأن ده مش طبعه ولا عوايده

الموضوع بسيط جدا..
سهل جدا أنك تخدعي بعض الناس لبعض الوقت
لكن من الصعب أن تخدعي كل الناس طول الوقت

التقييم: 6    [

+

|

-

]