Develop your website with us

أبو العربي كل سنة وانت طيب ويارب تكون بخير
هدخل في الموضوع انا اتخطبت ولكن شخصيته طلعت غير ما توقعت تماما وملقيتش بيننا أي تفاهم والموضوع اتفشكل أنا عارفة ان نصيبي موجود أنا مبعترضش والله.. بس بجد خايفة اكون مينفعش ارتبط بحد مش نفس تخصصي عشان حسيت كتير أوي بالفرق دة واضح جدا وكان عقبة جامدة جدا ان خطيبي دة مكنش من نفس التخصص بتاعي الي اتخرجت منه بالرغم من اننا احنا الاتنين مهندسين لكن مش نفس التخصص

مكنش فاهم دماغي خاالص ولا اهتماماتي ومش مقدر الي مريت بيه في الدراسة وشغلي.. يعني عارف لما تحس ان الي قدامك مش مهتم؟... بتحكي وتحكي ومفيش ما يدل على انه مهتم بالموضوع.. أو يرد بسطحية عشان ممرش بنفس المواقف.. فاهمني؟..هم شوية حجات كدة بس والله مكنتش فاكرة انها هتاثر للدرجة دي..

المشكلة دلوقتي اني بقيت اخاف من بكرة جدا وحسة ان عمري بيجري

وكل ما يجي حد يتقدملي مش حسة اني عايزة اقابله أصل الواحدة بتعرف الي قدامها يابو العربي يعني الموضوع بيتحس كدة ان الحد دة عايز يتجوز اي واحدة وخلاص ولا فعلا عايز واحدة تشاركه أحلامه وحياته واهتماماته وتكون كل حاجة ومحور اهتمامه بالفعل.. وانا فعلا محتاجة حد كدة وهو كمان يشاركني حياتي ويفهمني كويس ويحس اوي بكل الي انا بمر بيه

وطبعا ماما وبابا بيقولولي انتي بقيتي معقدة وبكرة تدوقي البهدلة وتاخدي اي واحد والسلام ان شا الله لو كان سواق مكروباص عشان انتي افتريتي والكلام دة بياثر فيا اوي وبفضل اعيط لما اتخيل نفسي في الوضع دة عشان حاجة مهينة اوي تحس ان قيمتك بتقل كل فترة.. احساس صعب اوي

انا دلوقتي في واحد متقدملي وبرده عندي نفس الاحساس ومش حسة اننا هنتفاهم.. خايفة اوافق على انه ييجي البيت ولما اقعد اتكلم معاه اكتشف اننا مش متفاهمين وساعتها هأُصاب بالاحباط زيادة في الموضوع الي تاعبني دة.. انا كمان بتضايف يا ابو العربي لما احس اني محل اختبار ممكن اتقبل وممكن لاء

وخايفة مقابلوش والعمر بيجري وقلقانة من كلامهم الي قالوهولي جدا

في النهاية بردو كل شيء نصيب بس انا بجد كنت محتاجة اقول الكلمتين دول واخرجهم من جوايا ان شالله حتى للكيبورد والشاشة
سلام

مؤمنة
24 سنة

كيبورد وشاشة!!
محدش بلغني خالص أن مباحث التومين هيغيروا اسمي.. ماعلينا

أني طبعا مقدر كل الكلام اللي جواتك دهون.. بس في حاجة نحب نأكدوا عليها ياريت تقبليها، مفيش يابنتي حد اليومين دول بيبص على الحاجات اللي أنتي قلتيها دي خالص.. الناس كلها بتشوف إذا كان الطرفين مناسبين لبعض ماديا واجتماعيا بس.. انما حكاية التخصص والوظيفة دي صعبة شويتين.

بيتهيألي كدهون أنك هتتعبي قوي عقبال ما تلاقي حد بالمواصفات الغريبة دي، ولو لقيتي ممكن تقابلي مشكلة أصعب.. أن السخص دهون يكون مغرور بنفسه ومش شايف حد غيره في الدنيا.. يعني م الآخر هيتجوزك عشان يتفشخر عليكي ويبينلك أنه أحسن منك في تخصخصك دهون.

يبقى العقل بيقول إيه.. (وده مش أسم ثالث ركزي معايا)
العقل بيقول أننا ندور في البيني آدم اللي جاي أو هيجي على أهم ثلاث حاجات ممكن يأثروا في بنى بيت المستقبل وهما (الدين.. والأخلاق.. والفلوس طبعا).

وده كله مع الشهادة، لأنه مينفعش تتجوزي واحد أقل منك، الموضوع ده بيعمل مشاكل كبيرة.. ومش هترسى أنك تبقى حرم سواق ميركوباظ ده اللي قالك عليه ماما وبابا.. مينفعش يا ماما.

فهمتي ولا إيه
عموما أنا كنت هتضايق جدا لو مقلتش الكلمتين دول.. حتى لو للواد السامبو.. روغمن أنه تقريبا مش هيفهم ولا حرف.. اقعدي بالعافية