كتير اوى بنقابل اشخاص ونحبهم من غير سبب من غير حتى منتعرف عليهم

وبرده كتير اكتر بنقابل اشخاص بنكرههم من اول نظره وبردوبدون سبب

الاقى واحد مثلا يقولى انا كارهك اوى

طب ليه ؟


من عند ربنا كدا يا اخى حاجه كدا لله فى لله

من غير حتى اى سبب معين أو حتى موقف حصل له


واحد تانى يقولى تصدق بالله انا حبيتك من اول ما شوفتك


طب ليه انت كمان ؟


مش عارف والله بس مرتاحلك اوى


برده لله فــ لله

دا اكيد بيحصلنا كلنا


بنحب نااااس ونكره ناس تانيين


من غير اى اسباب ولا اى مواقف بس هو كدا وخلاص

مسالتش نفسك مره طب دا من ايه ؟


مقولتش مره اشمعنى مشاعرى اتحركت للشخص ده

مع انك محتكتش بيه ولا حتى كلمته او اتعرفت عليه


طب واللى يقولكوا بقى ع السبب!!!!


بص يا سيدى طالما انك محتكتش بيه او حتى مكلمتوش

يبقى دا حب روحانى

ايوه روحااانى


روحك اللى حبت

وبرده روحك اللى كرهت


اصل بعيد عنك الروح دى سرها باتع


هيا المؤشر الاول لمشاعرنا واحاسسنا


هي قرون الاستشعار لقلبنا




فعلا بجد لانك لما تشوف شخص لأول مره


فـ روحك هى اللى بتبدا بالتعرف على روحه

فلو لقتها زيها بالظبط ونفس طباعها ائتلفت وتحابت وأجتمعت


والعكس صحيح

لو لقت الروح المقابله لها مختلفه تماما معاها في الطباع والصفات عنها تنكرها وتختلف معها فيحصل الكره


عشان كدا تلاقينا بنردد جمله كدا اسمها ....

الطيور على أشكالها تقع

ايوه هى دى الله ينور عليك

حتى تلاقى اى اصحاب مع بعض تلاقى طباعهم واحده


وزى ما قال ربنا فى كتابه الحكيم : الطيبون للطيبات والخبيثون للخبيثات


وفى مقوله بتقول : قل لي من صاحبك أقول لك من أنت ..


والسؤال دلوقتى ليكم


هل عشت التجربه دى وكرهت أو حبيت من غير حتى متتعرف ع الشخص التانى ده ؟؟؟